SAMANDAR VA RAYHON: ULAR BIR-BIRLARIGA YOQADILARMI?

Barchaning yuziga tabassum yugurgan, bir-birlariga sovg’a salomlar, mehr-muhabbat ulashadigan kun – Yangi yil kunini dunyo xalqlari intiqlik bilan kutishmoqda. Yer yuzidagi xalqlar, millatlar yoppasiga bor tashvishlarini chetga surib qo’yib, oila-a’zolari davrasida ushbu bayramni nishonlab, maza qilib xordiq chiqaradilar. O’tgan yilni sarhisob qilib, kirib kelayotgan yilga umid bog’laydilar! Yangi yil kechasining qadrli mehmonlari esa – Qorbobo va Qorqiz. Sahifamiz mehmonlari ham Qorbobo va Qorqiz bo’lib, ular Samandar hamda Rayhon siymosida xonadoningizga tashrif buyurmoqdalar.

  

-        Yangi yil siz uchun qanday bayram?

Samandar: Tushunishimcha, har bir faslning o’ziga yarasha go’zal, unutilmas kuni bo’ladi. Masalan, bahor faslida 21 mart – Navro’z bayrami. Ayni tabiat yashnagan payt. Yozda eng unutilmas kunlar bu lagerda dam olish bo’lsa, ajab emas. Zero, lagerda bemalol xursandchilik qilib, cho’milib, vaqtni chog’ o’tkazsa bo’ladi. Kuz fasli – bu xazonrezgi. Ya’ni, barglar birma-bir yer tomon talpinishi. Yomg’ir yog’ayotgan vaqtda ko’chada yurish juda ham rohatbaxsh tuyg’uni qalbingizga jo qiladi. Qishda esa, so’zsiz, 31 dekabr – Yangi yil bayrami. Har doim qish fasli kirib kelganida negadir to’lqinlanib ketaman, yana o’sha qor, Yangi yil, xursandchiliklar yodga tushadi. Yangi yil – bu xursandchilik bayrami!

Rayhon: Yangi yil bayrami – ko’pchilikning eng sevimli bayrami. Yangi yil – bu qandaydir ertakona, afsonaviy bayram. Men ham shu bayramni yaxshi ko’raman. Hamma Yangi yildan qandaydir o’zgacha bir yangilik kutadi. Men ham kutaman. Kelayotgan yil yanada omadli kelishini istayman.

-        Hayotingizdagi eng esda qolarli Yangi yil sovg’asi?

Samandar: Agarda eng esda qolarli yangi yil kechasini aytadigan bo’lsam, bu 2005 yilni kutib olishim bo’lgan. Muxlis sifatida yulduzlar yangi yilni qanday qarshi olishlarini tomosha qilish, juda ham qiziq va maroqli ekan. Bunday deyishimga sabab, oldimgi yil Yangi yilni AQSHning Nyu York shtati Manxetten shahrining Taymskver ko’chasida kutib olganman. Nyu Yorkning MTV telekanali bosh markaziy studiyasida butun jahon yulduzlarini to’plab, yangi yilni nishonlashgan. O’sha kechada “Snoop dog” guruhi, Jennifer Lopes, Britni Spirs, “Green day” guruhi, Jastin Timberleyk kabi jahon estradasi yulduzlari qatnashishgan. Deyarli 60 nafar yulduzlarning barida bir xil rangli kiyim edi. Ajablanarlisi, birgina oq matodan turli xil kiyimlar tikilgan. Kiyimlarni o’z ko’zingiz bilan ko’rganingizda, ularning fantaziyasi qay darajada yuksak ekanligidan hayratlanar edingiz. Yangi yil sovg’asiga kelsak, deyarli yangi yil sovg’asi olmaganman. (O’ylanib turib) Yodimga tushdi – adam rahmatli, quyon kiyimini sovg’a qilganlar. Bog’chadagi “utrennik”da quyon bo’lib chiqishim kerak edi o’shanda.

Rayhon:Yangi yilda esda qolarli sovg’a olmaganman. Odatda gullar, turli atirlar sovg’a qilishadi. Ammo bir safar German Gesso kitobini o’qishni juda-juda istab qidirganimda, topa olmagan edim. Keyin aynan Yangi yil kuni menga shu kitobni sovg’a qilishganida juda ham xursand bo’lganman.

-        Yangi yil kechasi, ya’ni 31 dekabr kuni sodir bo’lgan biron qiziqarli voqeani eslaysizmi?

Samandar: Bir yili yaqin bir akaxonimizning uylariga qorachadan kelgan bir do’stimni Qorbobo sifatida olib bordim. Eshikni taqillatdik, eshikni ochishga yugurib kelgan bolalar “qora Qorbobo”ni ko’rib, qo’rqib ketishdi. Bolalar hayron: qop-qora Qorbobo ham bo’lar ekan-da, deb. Haligi akaxonimizga bu hazilimiz yoqib tushdi. Haqiqiy yangi yil sovg’asi bo’ldi ularga. Shu voqea hech esimdan chiqmaydi.

Rayhon: San’atkorlar Yangi yil kechasida ko’pincha xizmatda bo’ladilar. Shuning uchun odatiy hol sifatida ishga otlandik. Kerakli barcha narsalarni olib, aytilgan joyga konsertga bordik. Manzilga yetib borgach, tayyorgarlikni boshlab, mini-diskni qidiramiz-qidiramiz, hech topilmaydi. Keyin bilsak, disklarimizni yoqotib qo’ygan ekanmiz. O’shanda yomon vaziyatga tushib qolganmiz…

-        2005 yil siz uchun qay darajada omadli yoki omadsiz keldi?

Samandar: Har bir yildan yaxshilik, omad kutaman. Bu yil men uchun omadli keldi, deb bemalol aytishim mumkin. Yaxshi-yaxshi qo’shiqlar yaratishga harakat qildim. Bu yildan ko’nglim to’lgani – haqiqiy ijodkor do’stlar orttirganimdir. Aynan mana shu ijodkor do’stlarim bilan 2006 yilda juda ko’p yangilik yaratish niyatidaman.

Rayhon: Bu yil menga omadli keldi. Eng asosiy yutug’im – bu O’zbekistonda xizmat ko’rsatgan artist unvoni bilan taqdirlanganim. Mustaqillik bayrami arafasida bunday faxrli unvon  bilan taqdirlanishdek quvonchli voqea bo’lmasa kerak. Bu yilgi yutuqlarim qatoriga fevral oyida o’tkazgan yakkaxon konsert dasturimni, “Faqat muhabbat” nomli albomim muxlislarim qo’liga yetib borganini, “Tarona-2005”da “Eng yaxshi albom” nominatsiyasida g’olib bo’lganimni, “Hech ayirilma”, “Qayta olmayman”, “Xo’p, mayli”, “Yodingdami?...”, “Yolg’izim” kabi qo’shiqlarimga klip ishlanganini va albatta ilk bor o’zimni aktrisa sifatida sinab ko’rganim, ya’ni “TV-Markaz” tomonidan suratga olingan “Yangi yil parisi” filmida suratga tushganimni qo’shishim mumkin.

-        Samandar Hamroqulovning Qorqiz – Rayhonga va uning ijodiga bo’lgan munosabati qanday?

Samandar: Juda ham chiroyli Qorqiz chiqdi Rayhondan. San’atkor sifatida Rayhonning so’nggi ijodiy izlanishlari meni qoyil qoldiradi. Inson sifatida juda ham soda, kamtarin qiz. Rayhon gulining isi boshqa gullar isidan ajralib turadi. Rayhon ham o’z ovozi, kuy qo’shiqlari, san’ati bilan boshqa xonandalardan ajralib turadi. Suhbat davomida uning yumshoq va chiroyli suhbatlashishi ham o’ziga rom etadi.

-        Rayhonning Qorbobo – Samandar haqidagi fikri qanday?

Rayhon: Ajoyib Qorbobo! Menimcha, Samandarni juda ham ochiqko’ngil va yaxshi inson bo’lganligi uchun qorbobo sifatida tanlagan bo’lsangiz kerak. Rostini aytsam, uni shaxs sifatida juda yaxshi bilmayman. Juda ham kam hollarda u bilan uchrashib qolamiz. Lekin, uni aqlli, ko’ngli ochiq, izlanuvchan va juda ham yaxshi inson, deb bilaman. Uning qo’shiqlari menga juda yoqadi. Estradamizning eng yorqin yulduzlaridan biri, deb hisoblayman. U nafaqat yaxshi xonanda, balki, juda ham yaxshi aktyordir. Shuning uchun ham men uni “Yodingdami?...” qo’shig’im klipiga taklif qilganman.

-        Yangi yil tilaklaringiz…

Samandar: Xohlaymanki, insonlarning 2010 yilgacha bo’lgan ish rejalari 2006 yilgacha amalgam oshsin. Yurtimiz tinch bo’lsin! Tinchlik bo’lsa, ijodimiz ham gullaydi. Shou-biznes dunyosining nufuzli sovrinlari “Oskar” va “Gremmi” bo’lsa, ana o’sha sovrinlar ham bizning tinch yurt farzandlariga nasib etsin.

Rayhon: Yangi yil kechasi soat 12:00da bong urganda, hamma eng ezgu tilaklarini tilaydi. Men ham aynan o’sha vaqt o’z tilaklarimni tilayman. Ezgu tilaklar amalga oshishini chin dildan istayman. Har bir insonning hayotida faqat va faqat yaxshilik, sevgi-muhabbat. Ezgulik bo’laversin!

Mirtohir Mirg’ulomov suhbatlashdi.

Mazkur intervyudan foydalanilgan holda sayt manzilini va suhbatdosh ismi-sharifini  ko’rsatishni unutmang!